اسمحولي في البداية لاني بحكي بالعامية ...

من فترة و انا عندي سؤال محيرني و مش لاقيله أي اجابة مقنعة ، حكيت أسألكم يمكن يكون في عندكم أي اجابة أو توضيح

كلنا بنعرف الحصار و الأزمة اللي احنا فيها و وضع المهندسين الصعب هدي الايام نتيجة الحصاااااار ، ما بدي أحكي كتير عنه لانه مابدو أي اضافة

لكن السؤال الغريب انه الحصار يمكن يكون مؤثر بشكل أساسي على المهندسين المدني و المعماري بالدرجة الأولى ، لكن بشو عم بيأثر الحصار على مهندسين الحاسوب ؟؟؟؟ (مابقصد معدات مش ممكن تدخل ولكن بقصد برامج ممكن تنعمل و تتصدر برا أو بعبارة أخرى out-sourcing أو غيرها من المشاريع اللي ممكن تكون مجدية ماديا بالدرجة الأولى و يكون سوقها برة غزة) و مابدي أحكي عن الامكانيات لانها موجودة بشكل يخلينا نبدأ نفكر في هدا الاتجاه (بدون أي تقييم محدد)

و السؤال اللي بينسأل كمان انه مين المسؤول ؟ مهندس الحاسوب (كفرد أو مجموعة) أو النقابات أو حتى وزارات هان في غزة، و بخص طبعا نقابة المهندسين و وزارة الاتصالات و تكنولوجيا المعلومات . وين دور النقابة في احتضان مشاريع صغيرة كانت أو كبيرة في هدا المجال (ماديا بالدرجة الاولى و لوجستيا بالدرجة الثانية و على مستوى العلاقات الخارجية بالدرجة الثالثة) لانه احنا كمهندسين حاسوب ما بعتقد انه في عنا مشكل تقني و لكن المشكل الاساسي اللي بنواجهه هو بعض التكليف المادية و المكان اللي لازم نجتمع فيه زائد التسويق (و أكيد في نقاط تانية بس مش وقته ...)

انا واحد من المهندسين أخدت أو ماأخدت دورات كتير بالنقابة و شاركت أو ماشاركت بالمسابقات أو الأمسيات أو الندوات اللي بتعملها النقابة، لكن بعتقد انها اليوم ما عادت كافية على الاطلاق

ياريت ازا حد كان متشجع لانه يعمل حاجة أو يغير وضع قائم ، خلينا نحكي بالموضوع أو نجتمع بالنقابة ، لانه ازا كان دور النقابة زي ما حكيت فوق ، هدا ما بعفينا من المسؤولية احنا كمهندسين ، لانه مش مطلوب من النقابة انها تفكر عنا كمان ...